موقف غريب وخبر اغرب

هبتدى الاول بالموقف الغريب 

مروحة من الكلية مع اصحابي كنا كتير اتنين سابقين وتلاتة ورا وانا ضمن التلاتة يعنى 

لقينا واحدة بتنادى علينا فعادى بنشفها عايزة ايه

لقيناها بتقول ان فلوسها ضاعت وانا عايزة اتنين جنيه علشان تروح اصحابي قالولها مش معانا فلوس 

فانا قلتلهم لأ حرام عليكم وناديناها واديناها الفلوس وقلتلنا والله دى اول مرة تحصلى ركزوا اوى فى الجملة دى 

لقينا اصحابنا اللى سابقين بيبصولنا وبيضحكواوبيقولولنا انتم اديتوا للبنت دى فلوس قولنلهم اه ليه 

اكتشفنا الحقيقة ان البنت دى كل يوم تقريبا بتعمل كده وحظها جه فى اصحابنا وكانوا ادولها الفلوس اللى طلبتها اللى هما بردو 2 جنيه وقالت نفس الكلام ان دى اول مرة وان فلوسها ضاعت وكل الكلام السابق ذكره 

اصحابي اضايقوا علشان هى ضحكت علينا وانها ازاى بتشحت وهى طالبة فى الجامعة 

الحقيقة انا مفرقش موضوع الكدب ده  معايا قلتلهم حرام ياجماعة يمكن فقيرة ومحتاجة الفلوس دى  

يعنى انا للنهاية هبلة وعبيطة 

بس اللى غاظنى وفرسنى انى اطلع من البوابة الاقيها بتركب تاكسي ركزوا اوى فى تاكسي دى بفلوسنا

هنا بقي خلاص مقدرتش ابقي طيبة اصل لو واحدة مش لاقية تاكل زى مانا متخيلة عمرها ماهتركب تاكسي انا مش قصدى طبعا ان الفقرا لازم يتشعبطوا فى الميكروباصات ولا حاجة بس اللى تلجأ للشحاته من الناس وتكسف نفسها كده يبقي اكيد محتاجة الفلوس دى اوى وغريبةاوى حكاية التاكسي دى حسيت بعديها انى اتنصب عليا اه المبلغ لايذكر بس بردو اضحك عليا

الخبر الغريب بقي 

قريته فى جورنال الاهرام عدد الجمعه صفحة الحوادث 

بيقول ايه  بقي 

عاطلان يقومان بتجميع حفاضات الاطفال  من القمامة واعادة بيعها

انا الحقيقة مستغربتش خالص ان اتنين عاطلين للعلم بالشيء واحد عنده 41 سنة والتانى 33 وماشاء الله لحد دلوقتى مش لاقيين شغل هناك امل 

المهم مستغربتش انهم قعدوا يدوروا فى صناديق الزبالة على البامبرز وجمعوه وباعوه لأ واتقبض عليهم وهما معاهم 5000 قطعة غير 500 عبوة كل واحدة فيها 40 قطعة 

ده يدل على حاجتين  على كمية البامبرز اللى بنستهلكها وكمية الصبر اللى عندهم انهم يجمعوا الكميات الكبيرة دى 

بس اللى مش قادرة افهمه ازاى نظفوا البامبرز ده من اللى فيه 

مكتوب انهم بيقوموا بتنظيفها وتجفيفها وغسلها 

ماعلينا ان الترتيب ده مش منطقى خالص بس ده اللى مكتوب فى الجورنال مش فاهمة ازاى بعد اما بيجففوا البامبرز بيغسلوه ماعلينا مش مشكلتنا 

بس بجد اللى شاغل تفكيري حاجتين ازاى نضفت مش مقتنعة ان الحاجات دى بتنضف ازاى يعنى 

وتانى حاجة احساس الاطفال اللى استخدمت البامبرز المغشوش ده 

بس اهم حاجة ان المخ المصري مازال قادرا على الابداع

ملحوظة صغيرة

عارفة ان بقالى كتير اوى مكتبتش حاجة فى المدونة بس بجد كانت وحشانى اوى الكتابة فيها ووحشنى كل اصحابي 

وهحاول ارجع اكتب بانتظام ان شاء الله 

وطبعا ميرسي اوى لكل حد افتقدنى او سأل عليا 

سلام    

 

    

حاجات من زمان

(1)
لقيت حاجة بقالها 12 سنة ياااااااااااه الواحد عجز خلاص ايام ماكنت فى رابعة ابتدائي
ورق امتحاناتى
افتكر كده معايا ايوة ايام اما كنت بتسحب ورق الاعدادية ادوك كده ظرف فيه امتحاناتك وانت طفل سنة ثالثة سنة رابعة انت وحظك بقي
هو انا صحيح مش عارفة ايه الحكمة من كده بس هى حاجة ظريفة الحقيقة
طبعا الظرف ده محتفظة بيه لحد دلوقتى ده كنز ياجماعة
بجد بعد ماقريت اجاباتى المدرسين دول صعبوا عليا اوى
انا لوكنت بقرأالاجابات المتخلفة دى كان جالى تخلف وشلل وكل الامراض المعروفة والغير معروفة
والظريف انه رغم ده كانوا ماشاء الله ايديهم حلوة فى الدرجات
نبتدى من القراءة وبالذات موضوع التعبير
انا عرفت انا ليه لحد دلوقتى مبعرفش اعبر عن نفسي ولا بالكلام ولا حتى بالكتابة
لان مواضيع التعبير كانت عبث فى عبث واحنا كبار كنا بنحفظها واحنا صغيريين عمر ماحد حاول يعلمنا نكتب ازاى او نعبر عن اللى جوانا صح
بلاش كلام كبير بقي ادخل على موضوعى التعبيرى الفذ الذى ينافس اكبر الاقلام الصحفية فى مصر والعالم اجمع
لانا هكتب تعليقاتى بالاحمر اللى اناقلتها وانا بقرأه مانا زيكم برضه يعتبر اول مرة بقراه
مر بك فى الايام القريبة الماضية يوم شم النسيم صف مافعلته وماشاهدته من مظاهر السرور والابتهاج
ده طبعا رأس الموضوع
نخش على الموضوع بقي
فى يوم شم النسيم ذهبت انا واصدقائي الى الحديقة العامة شاهدنا الاشجار العاليةوالازهار المتفتحة(واضح انى واصدقائي من النوع المتأمل ) وقعدنا على الحشائش الخضراء(اهوه قعدنا دى ضحكتنى ضحك يعنى ماشاء شغال من اول الموضوع لغة عربية والله ينور يعنى بعد كده اكتب قعدنا اسمها جلسنا ياغبية وبعدين مين دى اللى هتعقد على الحشائش علشان هدومى تتوسخ وابقي ملجألجميع الحشرات من اول النمل حتى النحل) وشاهدنا الاطفال وهم يلعبون بالكرةويمرحون(هو ايه النظام احنا رايحيين نتفرج بس مش هنلعب احنا كمان ولاايه) ولعبت مع اصدقائي بالكرة (الحمد الله لعبنا احنا كمان اهوه لم نكتفى بالفرجة يعنى) وركبنا المراجيح المختلفة(ده اكيد كذب انا بطلت اركب مراجيح من زمان اوى لانى عندى عقدة لان مرة كنت راكبة مرجيحة وفيه واحد دماغة اتفتحت ماعلينا انه هو اللى كان غلطان بس من يوميها وانا بترعب (وبعدها اكلنا المأكولات الشهية مثل الفسيخ والبيض الملون والاسماك والجرجير الاخضر(كل ده كلناه ماشاء الله واضح ان شهيتنا كانت مفتوحة على الاخر فسيخ وسمك فى نفس الوقت احمدك يارب(وبعدها ذهبنا الى الشاطىء(واضح انى كنت بتفرج على افلام خيال علمى كتيرة وانا صغيرة شاطىء ايه ده بقي الى فى الكفر الا بقي لو كنت انا واصحابي اطفال ابطال وبنسافر لوحدنا واحنا عندها 9 سنين )وتمشينا على النيل(اهي دى بقي بجد اللى تفطس من الضحك يعنى انا رايحة الشاطىء علشان اتمشي على النيل ولا انا كان خيالى واسع حبتين وتخيلت ان كفر الشيخ الخالية من جميع المسطحات المائية مش فيها بس بحر دى فيها كمان نيل )وبعدها ذهبنا الى منازلنا ونحن مسروريين(طبعا غلطة نحوية ونحن مسرورون بس طبعا الاستاذةاللى بتعلم ولا هى هنا ولاتلاقيها قريته اصلا ادتينى الدرجة وكفاية على كده) ملحوظة وانا فى رابعة ابتدائي كان خطى احلى بكتيرمن دلوقتى اه بجد
ملحوظة اخرى واضح انى كنت ذكية فى رابعة ابتدائي عن دلوقتى اه بجد
فى النحو سؤال استخرج جملة اسمية
القطعة كانت بتقول اهتم الانسان بالاسماك لاسباب مختلفة فهى رياضة لهواة الصيد وتقدم الغذاء لملايين من الناس
طبعا الجملة الفعلية واضحة وضوح الشمس بس بما ان مرحلة النظر الضعيف بدأت من رابعة ابتدائي فنظرى مااسعفنيش غير انى اشوف اول جملة بس اهتم الانسان بالاسماك بس دى جملة فعلية تعملى ايه يابت ياياسمين اها عرفت اخليها الانسان اهتم بالاسماك بس للاسف المدرسة لم تقدر هذه العبقرية وحسبتها غلط
اللى غايظنى بقي السؤال اللى بعده قال استخرج جملة فعلية
طبعا البديهى انى اكتب اهتم الانسان بالاسماك بس واضح انى قلت فى دماغى هو مفيش غير ام الجملة دى نعمل تغيير فكتبت تقدم الغذاءلملايين من الناساموت واعرف الست اللى كانت بتعلم دى حسبتها غلط ليه يعنى على مانا متذكرة تقدم دى فعل ولا ايه لو فيه حد مدرس عربي ياريت يفتينا فى الموضوع ده لانى متغاظة بجد
خلصنا امتحان العربي ندخل على الدراسات بقي
السؤال كان بيقول مااسم المحافظ ؟
طبعا بالنسبة لاطفال فى رابعة ابتدائي ده سؤال صعب جدا هعرف منين اسم المحافظ مش كفاية عارفة اسم المحافظة
ابص للى جمبي متعرفش اللى ورايا ولا عندها خبراصله اتعين من غير ماياخدوا اذنها اللى قدامى اغبي من الغباء كفاية انها عارفة اسمها استمر الحال كده لحد مااكتشفت اللجنة كلها متعرفش عمو المحافظ
انتقل الغش لمستوى اعلى المراقبين برضه مكنش عندهم خلفية عن الموضوع ده طيب يعملوا ايه يسيبونا كده ننقص درجة فى الامتحان لا طبعا ودى تيجى فتم الاستعانةبالخبرات الخارجية اللى هما مراقبين الدور لحد ماتوصلوا للقرار الحكيم بان عمو المحافظ اسمه محمود ابو الليل راشد احمدك يارب وهاجيب الدرجة النهائية فى امتحان الدراسات بعد الاخفاق الشديد فى العربي ولكن هذة السعادة لم تلبث ان اختفت تماما بعد قراءتى للسؤال التالى
من مهام المحافظ ؟
طيب بالذمة كده احنا اصلا منعرفش المحافظ هنعرف مهامه منين
هو طبعا كان السؤال فى المقرر بس اعترف انى كنت فاشلة جدا فى ابتدائي افتكرت حاجتين ومقدرتش افتكر تالت حاجة
وطبعا زى مانتم عارفين خيالى كان واسع حبتين واقدرت اكتشف المهمة الثالثة للمحافظ ا
اول حاجة كتبتها يدير شئون المحافظة
تانى حاجة يحافظ على الامن فى المحافظة
التالتة بقي هى دى بقي اللى نتجت عن عبقريتى الفذة ايام الطفولة
كتبت انه بيعمل على اسعاد المحافظة ههههههههههههههههههه
طبعا دى متحسبتش صح الا بقي لو كان المحافظ عامل الخط الساخن للنكت او عامل مشروع مهرج لكل مواطن ده او غير اسم المحافظة الى كفر السعداء وكل ده للاسف متعملش
كفاية فضايح لان امتحان الرياضة كان فية فضيحة كبرى الاوهى صفر كبير مكلبظ منور على سؤال الرسم الهندسي
بس واضح انى كنت شاطرة فى الانجليزى والعلوم لا الفضايح فيهم لا تذكر الحمد الله
سلام بقي

تاج

وصلنى التاج ده من منى my hope
والحقيقة جه فى وقته لان بقالى كتير اوى مكتبتش حاجة جديدة لظروف الامتحانات طبعا وحتى بعد ماخلصت مفيش فى دماغى حاجة اكتبها حاسة ان دماغى ممسوحة باستيكة فاضية اوى
الغريبة ان طول فترة الامتحانات كانت ايديا بتاكلنى عايزة اكتب حاجات كتيرة ودماغى فيها افكار لمواضيع كتيرة بس دلوقتى كلها طارت
المهم نبتدى التاج بقي

هواياتى؟
اول حاجة القراءة
بحبها جدا وباسمتع بيها جدا
واحلى تعليق بقي اتقالى فى الموضوع ده كانت معايا واحدة صاحبتى وانا بشترى كتب احتفالا بالاجازة ودفعت 45 جنية كنت مفلسة حبتين وضصاحبتى قالتلى انا ميهنش عليا ادفع الفلوس دى فى كتب انا اشترى مثلا مكياج او اكسسوارات قلتلها انا بقي العكس هههههههههههههههه
تانى حاجة الفرجة على التليفزيون لو كانت دى بتعتبر هواية يعنى
مع ان التلفزيون كان واحشنى اوى بعد الامتحانات بس لحد دلوقتى معقدتش ساعتين على بعض اتفرج عليه بقيت بمل منه اوى مش عارفة ليه
ثالث حاجة النت
بقيت برضه بمل منه جدا مش بلاقي حاجة اعملها هو انتوا صحيح بتعقدوا تعملوا ايه على النت هه
رابع حاجة الرسم
بس بطلته من ايام ماخلصت جامعة لان المحاضرات خلصت
هتقولولى ايه العلاقة
انا كنت بلم كشاكيل اللى حواليا وارسمها ده فى الفترات اللى مش بنام فيها يعنى فى المحاضرة
خامس حاجة بحب ادخل السينما اوى وبحب اخرج مع اصحابي بس فى اماكن حلوة بعيدا عن كفر الشيخ وضواحيها
الهواية الجديدة بقي ليا هى الزرع بقيت بحب اربي الزرع
اصلى كنت عايزة اربي حيوان اليف بس انا الحقيقة بكره الحيوانات اوى كل الانواع فكرت فى قطة بخاف منهم وبتقرف كمان منهم الكلاب اكيد لا العصافير مزعجة السلاحف شكلها مقزز مع انى كل الناس كانت بتشجعنى انى اربي سلحفاة علشان شبهى كسولة زى السمك صاحبتى عندها وعملينلها فيلم الفك المفترس وقاعديين يقتلوا فى بعض
فكرت فى الزرع وجربته وعجبنى جدا انا عندى ريحان وبقي كبير اوى ومتعة انك تشوف حاجة بتكبر قدامك
وعندى نبات ظل بس مش بحبه مفهوش حياة بحس انه بلاستيك
وناوية اجيب بقي فل وياسمين ونعناع ان شاء الله
اهم هواية بقي عندى ومشهورة بيها هى النوم
دى الحاجة اللى مملش منها ابدا ههههههههههههه

اشهر عيوبي؟
اكيد عندى عيوب كتيرة بس انا اقلهالكم ليه اكتشفوها انتم بنفسكم بلاش فضايح

حاجات بكرهها جدا ؟
انا جاوبت على السؤال ده قبل كده بس معنديش مانع اجاوبه تانى هههههههههه
بكره الكذب بصدق الناس بسرعة انا بشوف ان كل الناس صادقيين حتى يثبت عكس ذلك وده يشمل الحاجات الخرافية اللى مش ممكن اصدقها وانا بعبطى بصدق وفى الاخر تطلع اشتغالة
بكره الكوسة اوى فى الاكل يعنى معتقدش انى ممكن اطبخها فى حياتى حتى لو كانت الاكلة المفضلة لزوجى المستقبلى اما يجى يعنى
بكره القبح فى اي حاجة بحب الجمال اوى بحب اشوف كل حاجة جميلة حواليا
بكره الفقر والضعف وبكره قلة الحيلة
مش متذكرة دلوقتى حاجة تانية بس انا عموما بكره حاجات كتير

حاجات بحبها جدا ومش بمل من تكراها؟
مش عارفة انا بمل بسرعة من اى حاجة
ممكن نقول القراية بمل منها بصعوبة
مشكلتى اللى بتخلينى امل بسرعة انى افضل اعمل حاجة علطول بفضل معلقة على حاجة كتيرة فلازم امل منها بعد كده حتى فى الاكل بعمل كده برضه

سؤال بيستفزنى؟
والله فى اسئلة مستفزة كتيرة بس بجد اللى بينططنى
انتى ليه مش بتحطى make upفى الكلية يعنى؟
سؤال مصيري فعلا
انا مش مقتنعة ان يبقي عندى محاضرة الساعة 8 الصبح وبعد كده اتحولت فى التمهيدى اللى 10 بس ده مفرقش معايا غير انى انام ساعتيين زيادة
اصحى من الفجر علشان اروح الكلية متألقة انا كنت بصحى 7وربع وثلث حسب الظروف وبتوصل ساعات لسبعة ونص يعنى يادوبك البس الواحد يتذوق خارج مع اصحابه بليل بعملها فى الكلية بقي فى الاعياد والمناسبات واما نكون ناويين نتصور او هنخرج بعد الكلية ناكل بره او اما يكون عندى مزاج والمزاج مش بيجى عادة
والسؤال التانى المستفز انتى مش بتلبس عدسات ليه بدل النظارة؟
وانتم مالكم انا مبسوطة كده مش عارفة الناس تقريبا مضيقالى سلف بتخنق انا عاجابنى نفسي كده انا حرة
بس ماعلينا بكره يعقلوا ههههههههههه

امنيتى فى الحياة؟
نفسي ابقي شخصية محبوبة ونفسي ابقي متدينة التدين الصح يعنى
نفسي اخد الماجستير علشان اخلص
نفسي اكتشف انا عايزة ايه اعمله فى حياتى لسه مكتشفتش لحد دلوقتى
نفسي اتجوز حد بحبه ويحبنى ويكون تفكيره زى مانا عايزة مش زىمابشوف الرجالة اللى حواليا واخلف بنات حلويين

حاجات مؤمنة بيها جدا؟
ياخبر النهاردة بفلوس بكره يبقي ببلاش هههههههههههه
اصل البنات بيبقوا فوضوليين اوى انا مقتنعة ان الواحد مش لازم يموت نفسه علشان يعرف حاجة كل حاجة فعلا بتتعرف فى الاخر

اكتر حاجة فاشلة فيها؟
مسك السكينة لحد دلوقتى مش عارفة امسكها صح وبالتالى مش بعرف اقطع اى حاجة من غير الاختراع العبقري القطاعة بس المشكلة دلوقتى البامية همعقها ازاى؟؟

وظيفة بحبها؟
سواق التاكسي بحب الشغلانة دى اوى
والصياد
والرسام طبعا
كان نفسي ابقي حاجة من التلاتة دول

مثلى الاعلى فى الحياة؟
الرسول عليه الصلاة والسلام نفسي اقتدى بيه
فيه بنات كتيرة انا ببقي معجبة بشخصيتها زى منى ايوة my hope
وبنت كانت زميلتى فى الكلية اسمها شيماء كنت بحبها اوى

بمرر التاج لمين
يعنى انا مش عارفة ناس كتيرة ومعظم اللى اعرفهم اكيد وصلهم التاج بس ممكن امرره ل
وائل احمد
وايات جودت
يالا سلام بقي

تانى

هكتبه تانى وامرى الى الله
بصوا ياجماعة
اول حاجة عايزة اقولكم عليها
انى بقيت خلاص من اصحاب المرتبات ومش هقول على المرتب كام علشان العين وبالذات عين وائل
انا كنت فاكرة انى هبقي مبسوطة اما اقبض اول مرتب علشان هيحسسنى انى بقيت كبيرة وبشتغل والحاجات الهبلة دى
بس طبعا بما انى مش حاسة اصلا انى بشتغل ده غير انى مش حاسة ان ده مرتب اساسا حساه اقرب الى مكافأة زى اللى كنا بناخدها فى الكلية اما نجيب جيد جدا ولاامتياز بالاضافة انى بقيت بكره الكليه جدا وبكره اروحها وبكره نفسي وبكره كل حاجة
المهم اقولكم برضه المرتب كام علشان تبقوا مبسوطيين زى كده ههههههههههههههههه
المرتب 268 جنيه وربع
يعنى اتفشخر عليكم كده وانا قلبي مطمئن واى حد مزنوق ومحتاج فلوس يقولى علطول انا رقبتى سدادة والخير كتير ياجماعة

تانى حاجة بقي
انا حضرت اول حفلة توقيع فى حياتى و لأ وكمان ل د \علاء الاسوانى
كانت حفلة جميلة اوى واتبسطت انى حضرتها وهى كمان كانت فى المنصورة
ابتدى من الاول
انا قلت لديدى صاحبتى فى حفلة توقيع لرواية شيكاجو لعلاء الاسوانى تيجى معايا
هى قالتلى ماشي وهى اساسا ولاتعرف شيكاجو ولاتعرف علاء الاسوانى بس ديدى من النوع لو قلتلها انا رايح القمر تيجى انا رايح القسم تيجى معاك علطول
بس انا بقي كنت فكراها عارفة شيكاجو بتحكى عن ايه لانى كنت بقرأها انا وسهيلة صاحبتى فى الدستور كنت بنتناقش فيها قدامها بس هى كانت نسيت وقال كانت فكراها كتاب فى السياسة وبتقول هى ياسمين بتقرأ الحاجات المملة دى ازاى ده غير انها فاكرة علاء الاسوانى واحد مش مهم اساسا ومش مشهور
انا قلت اما قلها نبذة عن الرواية واحنا فى السكة علشان متفضحنيش هناك لو سمعت كلمة كده ولاكده انا عرفاها هتعقد تضحك وتفضحنى
اول مادخلنا المكتبة لقيت ديدى بتقولى ده مجاش طبعا كان موجود قولتلها اهوه ياديدى قدامك تقوم تقول ايه ده طلع شكله وحش
الندوة كانت حلوة وكلامه كان مقنع بس ده ميمنعش انى قريت معظم الكلام قبل كده برضه فى تعليقه عن الراوية فى الدستور وكمان دمه خفيف اوى ومتواضع متحسش خالص انك قدام كاتب مشهور
هو بس فيه مرتين الناس فهمت كلامه غلط ومسكت بقي فى الكلام ودخلوا فى حوارات تانية خالص لحد موصلنا للحجاب
حتى ديدى عجبها كلامه مفيش غير حاجة واحدة اختلفت معاه فى الرأى فيها
اما كان بيرد على السؤال التقليدى والمتكرر واللى اتخنقت انا ذات نفسي منه
وهو ايه لازمة المشاهد الجنسية الكتيرة فى الراوية؟
هى بقي معجبهاش الرد اما قال ان الواحد اللى عايز يثار اكيد مش هيقرأ رواية 600 صفحة علشان 15 صفحة فيهم المشاهد دى
ديدى رأيها ان ممكن واحد مش فى دماغه حاجة وبيقرأعادى ممكن يثار ساعتها ودماغه تروح لحاجات تانية
انا رأيي بقي ان ليه الناس بتفصص الحاجة متاخدش الحاجة على بعضها انا عن نفسي بحب شيكاجو اكتر من عمارة يعقوبيان بكتير جدا حساها اكتر انسانية والواحد كان عايش مع الشخصيات اوى وبيتأثر بيهم
ده غير انك تقول مابتقرأها مستمتع جدا عمرك ماتحس بالملل علطول عايز تعرف ايه اللى هيحصل بعد كده
ده انا كنت هطق علشان انا بقرأها مسلسلة واول حاجة كنت بعملها يوم الاربع انى اشترى الدستور واقرأ الرواية
اوحش حاجة فى د\علاء انه بيشرب سجاير بطريقة بشعة
انا اصلا مش من النوع اللى السجاير بتضايقنى بس المرة دى كنت خلاص عنيا بتحرقنى وبتدمع ومش قادرة مشفتش حد بيشرب سجاير بالطريقة دى
انا طبعا جبت الراوية علشان يوقعلى عليها معرفش ليه كان عندى اعتقاد غريب ان كل الكتاب خطهم حلو بس خلاص علاء الاسوانى غيرهولى خطه وحش اوى ده اوحش من خطى
اما كان بيوقعلى تجرأت شوية وكلمته انا اصلا طول الندوة مش بتكلم ومسألتش اى سؤال انا مش من النوع الجريء ده خالص والعيال هناك ايه يعقدوا بيسألوا ويتكلموا بثقة اوى معرفش بيجبوها منين دى
المهم قلتله النهاية واقعية بس حزينة قال لأ شيماء وطارق هيتجوزوا فى الاخر بس كل الستات عايزيين هو يجى يطلبها للجواز وهى مترضاش انا ساعتها قلتله لأ انا كان قصدى انى كنت عيزاه يلحقها قبل ماتعمل عمليه الاجهاض وجايه اقوله للى انتحر هو اللى مؤثر نسيت اصلا اسم الراجل اللى انتحر من اللخمة بس هو راجل عسل اوى
المهم الندوة فضلت 3 ساعات كنت هزعل اوى لو محضرتهاش
ده غير انى كمان شفت غادة عبد العال
اناوديدى مكناش قاعدين جمب بعض علشان مفيش اماكن انا شفت غادة وعرفتها وديدى كمان برضه لان ديدى من اكبر متابعى التليفزيون اللى ممكن تشفهم فى حياتك واول ما ادونا ربع ساعة ريست علشان توقيع الكتاب قلنا لبعض فى نفس الوقت مش دى غادة
طبعا احنا كنا مكسوفين نكلمها قلت لديدى روحى قولها مش انتى غادة علشان نسلم عليها
راحت ديدى ولقيتها بتسلم عليها فرحت انا كمان اسلم عليها وقلتلها مدونتك حلوة والكتاب انا جبته زى ماقلتى ومكنتش برضه كالعادة عارفة اتكلم وبعد اما سبناها قلت لديدى انتى قلتلها ايه قالتلى ولاحاجة قلتلها ازيك وسلمت عليها
كان يوم حلو اوى واتبسطت انى شفت د علاء الاسوانى وغادة كانت حفلة 2 فى 1
على فكرة غادة احلى بكتير من التليفزيون وكمان شكلها اصغر التليفزيون مكبرها شوية وكمان عسولة اوى
كده كويس اوى انى كتبت الكلام تانى ومش هقدر اتناقش معاكم فى الكلام اللى اتقال فى الندوة لانى اتناقشت مع اصحابي فيه ده غير انى مضايقة ان الكلام اتمسح وانى بعيد تانى بحس بملل كده

ثالث حاجة
الامتحانات قربت اوى وانا مش عارفة حاجة فى مواد كتيرة حاسة ان كل حاجة فوق دماغى وماليش نفس اذاكر واتخنقت خالص من الدراسة بس انا عايزة انجح علشان اخلص بقي يارب يارب انجح بقي ادعولى

اوف

انا مش طايقة نفسي بعد ماكتبت بوست طويل عريض اتمسح لوحده اوف
مش هكتبه تانى لو حصل ايه
انا زعلانة
عاااااااااااااااااااااااااااااااااااااااااااااااااااا

انا نجحت ياجدعان

انا نجحت ياجماعة الحمد الله
النتيجة عرفتها بقالى اسبوع من الكنترول بس هى طلعت يوم السبت رسمى
بس طبعا انا من انصار اجل عمل اليوم الى بعد بعد بعد غد
كانت فترة انتظار النتيجة فترة مقرفة
اول مرة اخاف كده من انتيجة وابقي متوترة
انا عيطت عياط قبلها وبعدها
قبلها لانى كنت خايفة اوى احسن اشيل حاجة وافضل للنة الجاية
وبعدها لانى كنت فرحانة اوى ومش مصدقة نفسي انى نجحت وفضلت مش مصدقة وحاسة ان الدكتور شاف اسمى غلط مع ان البت فوفو اما الدكتور قلنا نرجع لورا علشان منشفش النتيجة من علىا لكمبيوتر وهو اللى يقولهلنا هى بقي لئيمة فضلت واقفة وقالتلى كمان على مجموعى وانى جايبة 83.5% بس برضه مكنتش مصدقة انى اجيب المجموع ده وقلت يمكن شافت غلط
واكتر حاجة تغيظ ان الدكتور اللى معاه النتيجة ذلنا ذل علشان يدهلنا فظيع
واحلى حاجة بقي اما كنت بعيط علشان مش عارفة اجيبها وخايفة ولمة العيال حواليا والواد حوحو يقولى انتى بتعيطى ليه يابنتى هوانتى جبتيها
عارفيين اقول ايه وحتى لونجحت الترم ده مش هنجح الترم التانى
مش ممكن على كمية الاحباط اللى بجيبها لنفسي
مش عارفة انا علطول متشائمة كده ليه
وعلطول بقلل من قيمة نفسي مش عارفة ليه
هو تقريبا انا طلعت بفهم وانا مش واخدة بالى
اصلا معظم الناس بتفتكرنى سوسة
لانى مثلا فى الترم اللى فاتت طلعت من امتحانيين قلت انى حليت وحش وواحدة عيطت فيها كمان وقلت انى ممكن اشيلهم
مش عايزة اقلهم انى جبت فىالمادة اللى انا عيطت فيها دى اكتر من ابنات اللى كانوا بيصالحونى
هى مشكلتى انى بحس انى مادام محلتش الامتحان كله يبقي انا حليت وحش وانى هشيل المادة
المهم انى الحمد الله نجحت وجبت جيد جدا والبت فوفو اكدتلنا ان نظرهها مازال 6على 6
وكمان انا جايبة تانى اعلى حد هو مفيش ترتيب فى التمهيدى طبعا بس لوفيه يبقي انا التانية
وكمان اللى بسطنى اوى ان اكتر مادة محتاج فهم واللى بيقولوا عليها اصعب مادة كانت عندنا فى الترم جبت فيها 95من 100
كان نفسي اجيب فيها اعلى واحدة بس البت يويو جابت 97 بس هى تستاهل ماشاء الله ياجماعة هى ذكية اوى اوى وهى برضه اللى جايبة اعلى مجموع
بس عموما انا بحب اكون التانية مش عارفة ليه
حتى اما كنت فى سنة ثالثة وطلعت الاولى مكنتش فرحانة كنت حاسة انى مش ممكن اطلع الاولى
وبالفعل البت فوفو كانت عملت تظلم فى مادة وخدت درجات وبقت الاولى وانا التانية
علشان مغيرش فكرتكم عنى انى كلى احباط وتشاؤم الفرحة اللى انا كنت فيها تحولت تانى يوم لاكتئاب لانى لسه مبدأتش مذاكرة وبقالى شهر بقول هبتدى النهاردة حتى الواد حوحوسألنى انتى هتبتدى مذاكرة امتى وقلتله من اول 3 يعنى لو كان سمع كلامى اكيد دلوقتى بقي خلص المنهج
ده غير انى حاسة ان المواد اصعب السنة دى
واكتر كمان وكل حاجة بايظة ومش عارفة اذاكر كالمعتاد
وحاسة ان كل حاجة فوق دماغى
انا مكتئبة ةعايزة حد يجى يذاكر بدالى
نفسي افهم انا ليه اما بقرر حاجة مش بعملها
مش عايزة اقولكم ان قرار انى احضر كل السكاشن متنفذش خالص
محضرتش السكشن الجديد ده
مبحضرش غير سكشن رابعة اللى هو يوم الاحد
انا بحب يوم الحد اوى كل الاضرابات بتبقي فيه
انا بت محظوظة اضراب اعضاء هيئة التدريس كان حد ومكنش فيه سكشن ونمت فى البيت
ويوم الحد الجاى اضراب
انا بحب الاضرابات
اخر حاجة بقي
مروة جمعه بقت خلاص تميمة حظى لانها الوحيدة اللى كانت بترفع معنوياتى وتقولى انى هنجح وهجيب جيد جدا مع انى مكنتش مقتنعة بموضوع جيد جدا ده لان عندنا الجيد جدا من 80% وكنت بقول لو نجحت فى كله هجيب جيد
وديدى صاحبتى برضه كانت بتول انا حاسة انك هتجيبى جيد
سلام

للأهمية

مكنتش اعرف انى مهمة اوى كده بس اكتشفت مدى اهميتى يوم الاتنين اللى فات الكليه كلها كانت مقلوبة بتدور عليها
عاوزيين تعرفوا مقلوبة ليه نبتدى من الاول
ابتدى من الاول ولامن الاول اوى
لأالنهاردة مودى رغى فانتهزوا الفرصة دى لانها مش بتكرر كتير
البداية بعد انتهائي من الثانوية العامة بمجموع عالى جدا جدا يؤهلنى لدخول الكلية اللى هنا عيزها واعقد واتأمر كمان
93.4%لازم ال 0.4دى احسن تقولوا عليا فاشلة ولاحاجة
وطبعا الخيارات كانت قدامى كتير
كلية علوم واستحمل صعوبتها وان يتقال عليا معقدة واستحمل انها بدون هدف فى الحياة ولا مستقبل سوى انك تكون مندوب دعاية اد الدنيا
او كلية تجارة وتنضم لالوف الطلاب ويجيلى تخلف عقلى انك ازاى تنجح فى مادة مكتبتش فيها غير شوية اغانى لعمرو دياب وانك تشيل مادة اعقدت تكد وتكدح فى حفظها مفيش فهم محدش يحاول يقنعنى ان فيه كلية ما تحتاج للفهم
او تدخل كلية اداب وهى كلية ملهاش اى لازمة فى الحياة على رأى طلابها وتفضل طول حياتك تسأل نفسك السؤال المصير هو انا ياترى اعتبر دخلت كلية ولا ولأ
او زراعة مثلا وتنضم لطلاب العلمى الفاشلين اللى ملقوش كليه تلمهم غير زراعة اللى بتاخد من 70% مع انها كلايه مهمة وكمان دراستها صعبة يعنى موت وخراب ديار
او تربية وانااخر حاجة افكر فيها انى مدرسة لانى مبعرفش خالص اشرح او افهم حد ودى موهبة مش عندى للأسف
المهم بعد يوم كئيب مع اختيار اهلى لكليه تجارة انجليزى قررت دخول علوم اهوه برضه احسن من مفيش
وطبعا بعد مناقشات عديدة تهدف لارعابي من الكلية وانى هفشل فيها فشل ذريع
قررت انى ورغم الصعاب والتحديات سأنجح فى هذه الكلية
والحمد الله نجحت وتفوقت وطلعت الرابعة على الدفعة
المهم هما عينوا اتنين بس من دفعتنا حوحو وفوفووالباقي بيبقي حاجة اسمها منح يعنى بندرس على حساب الجامعة وكمان بيدونا فلوس اه انا لسه مشفتش فلوس غير انهم رجعولنا الالف جنية اللى خدوها علشان التمهيدى بس بيقولوا ان المرتب 300جنية رضا حد لاقي
يعنى المنح دول بيبقوا زى المعيديين بس مش متعيين يعنى مش هيبقوا دكاترة فى الجامعة
بس بينزلنا جدول زيهم وعايشيين حياتنا زيهم بس احنا فرز ثانى
المهم الجدول نزلى كان صغير لان اسامينا انوافق عليها فى شهر 2 يعنى بعد الترم التانى ماكان اشتغل خلاص والسكاشن اتظبطت لكن الواد حوحو والبت فوفو عندهم 9سكاشن فى عين العدو
انا بقي كانوا اتنين واحد سنة اولى والتانى سنة رابعة
بتاع اولى ده مش بحضره علشان بيبقي عندى محاضرات
متخافوش بيبقي فى السكشن معيدة غيرى فعى اللى ماسكة السكشن
بتاع رابعة بقي مفروض احضره لان اليوم ده اساسا ريست عندى
بس ازاى اتعامل مع سنة رابعة اصلا نص السكشن بالظبط دفعتى
ده غير انى حسيت انى كم مهمل وماليش اهمية فى السكشن لان فيه معيد بيشرح انا هعقد اعمل بيبقي سكشن ممل اوى وخنيق بالنسبة ليا
فقررت الاسبوع ده محضرش وقلت بلاقرف هتعب نفسي ةاصحى الساعة 8الصبح علشان ولاحاجة
بس ونمت
لقيت تانى يوم بعد ماخلصت محاضرات ورقة متعلقة مكتوب فيها اسمى وانهم عايزيين للأهمية القضصوى قلت يالهوى
خلاص انا ضعت هتهزأ لحد مايبانلى صاحب من عمو رئيس القسم هو صعب اوى وشايف شغله كويس اوى ولازم كل حاجة تبقي صح ومظبوطة وبيلف على السكاشن ويشوف مين جه ومين مجاش
والواد حوحو لسه كان متهزأ علشان مجاش سكشن كان عنده محاضرات فيه
ررحت السكرتارية طبعا مكنش فيه حد موجود لانى بخلص المحاضرات متأخر لقيت عمو واحد قالى انتى منحة يبقي اكيد عايزيينك علشان انتى مش بتحضرى السكاشن وابقي تعالى للدكتور بكرة
طبعا قلتله اناااااااااااااا انا بحضر كل السكاشن
وطول اليوم الاقي كل الاناس بتقولى على فكرة هما عايزيينك فى السكرتارية هتتهزأى اكيد
وتليفونات بقي خلاص والله عرفت بعد ماكل الناس عرفت انى عرفت بقى السؤال التانى هما عايزيينك ليه
المهم اليوم اللى بعده انا مبروحش الكلية ده غير انى كنت بحاول تأجيل المواجهه
بس الواد حوحو كلمنى اليوم ده بليل يقولى انهم سألوا عليا تانى فى اليوم ده وعايزيينك ضرورى ويقولى اما يهزأك الدكتور خديه على قد عقله لانه راجل وحش هو خبرة بقي
زاد خوفى واترعبت اكتر وقاعدة افكر فى الحجة اللى هقولها
وافكر ياترى اروح انا عنده وهيزأنى فىا مكتبه والموطفيين اللى هناك هما بس اللى يشهدوا الواقعه ولااطنش وادعى ربنا انه ينسانى واروح اشيل الورقة اللى مكتوب فيها اسمى
ولا استنى لحد مايجيلى السكشن ويهزأنى ادام الطلبة وتبقي فضيحتى بجلاجل هو من النوع الغريب حبتين عنده الطالب دايما على حق اما كنا طلبة كنا بنحبه اوى لانه كان بيجيبلنا حقنا بس دلوقتى انا بترعب منه
قلت اروحله انا وامرى الى الله اليوم اللى بعد وانا فى التاكسر لقيت البت سارة صاحبتى بتقلى على فكرة هما قالبيين عليك الدنيا وروحيلهم ضرورى قبل المحاضرات
وانا يبادى النيلة كل ده علشان محضرتش سكشن واحد وجودى فيه مش هيقدم ولا هيأخر
طبعا كالعادة وصلت متأخرة قلت احضر المحاضرة الاول هى مكنتش مهمة بس انا قلت اجل التهزيق شوية وبعد ماخلصت المحاضرة قلت للعيال حد يجى معايا علشان انا خايفة فواحدة شجاعة قالتلى انا هروح معاكى لسه رايحة لقيتهم هما جايين
بس دى كانت طنط من السكرتارية وقالت اسمى اكنى عملت مصيبة رحتلها وانا بارتعد وقالتلى تعالى بره قلت كويس مش هتهزق قدام العيال مع انى مش بيهمنى هما مننا وعلينا برضه
لقيتها بقي بتقولى على السبب اللى خلى الكلية كلها تبحث مع الشرطة عليا وكان ناقص يحطوا صورتى ويكتبوا مطلوب حيا او ميتا والسبب اللى خلانى مرعوبة 3 ايام
قال ايه كل ده علشان فيه سكشن جديد ليا فى الجدول
قال ايه علشان الدكتور المشرف على السكشن ميزعلش هو اساسا مشرف برضه عندى فى سكشن رابعة مراته بقي مشرفة عندى برضه بس فى سكشن اولى ابنهم بقي الحمد الله مش معايا فى اى سكشن
يالهوى كل الرعب ده علشان سكشن اضافلى وجودى فيه من عدمه مش هيضيف حاجةمكنتى ياختى تقولى لاى حد المعلومة دى وهو يوصلهالى
عموما قررت انا ياسمين انى بعد كده هحضر كل السكاشن العمر مش بعزقة